Luk 14 | TPZ | STEP | O pöh Poen Apaapo ne Ieesuß to nö pa ëën pa iuun pe susun po Parësiß. Ka napan ut rakah e ne peß.

Luke 14

E Ieesuß To Vatoß Hah A Pah Teß Supsup Sionin

1 O pöh Poen Apaapo ne Ieesuß to nö pa ëën pa iuun pe susun po Parësiß. Ka napan ut rakah e ne peß. 2 A pah teß supsup sionin to teß vatët non manih pe Ieesuß. 3 Ke Ieesuß hi a ma teß vavaasis to nat ne o Vavaasis pe Mosës, me o Parësiß pan, “A taateß kës pea to vaonöt e non pa ö na se vatoß hah a teß koman o Poen Apaapo, keß ahik?” 4 Ivëhkëk, a ma teß vavaasis to nat ne o Vavaasis pe Mosës, me o Parësiß to teß vasup e ne. Ke Ieesuß vaket pa teß pamëh, pareß vavih hah poan, ko vanö hah en peß. 5 Pareß soe ke raoe pan, “Ta pah teß manih peöm se keh teß me non a pah koaß oeteß, keß, a purmakaöß, keß vuß hop pa koveß ruen ruruvun, ka teß pamëh to hikta onöt pöß non a rëh peah vëhöß hah poan po Poen Apaapo, ha?” 6 Ivëhkëk, ee to hikta onöt ne a piun a soe pamëh.

A Teß Se Vöknah Hah Ea

7 E Ieesuß to inan a napan to nö maß pa ëën a taëën, ko iu ihoß rakah ne pa ma ö ihoß vamomoaan. Ivëh, keß heß a pah soe vapipinoß manih pee. Eß to soe pan, 8 “A pah teß se keh vaoe maß oah pa nö po vaënëën apuh va po vaen, eën se nat nom ihoß manih pa ö ihöß pa nap apaßpuh. A teß pamëh tomeß vaoe a meh teß no a ëhnaneah to teß oah e non pa ëhnöömah. 9 Eß se keh teß va non nën, a, a teß vëh to vaoe a neöm pom se nö maß, pareß soe ka oah pan, ‘Eën se heß a ö ihoß vamomoaan manih pa teß vëh’. Kën se pah poet rakah eom ko nö, parën ihoß e nom maß manuh po vasuksuk rakah. 10 Ivëh, ka teß se keh vaoe maß oah po to vaënëën, eën se nö, parën ihoß manih pa ö ihoß vasuksuk, a, ka teß vëh to vaoe maß oah se nö maß, pareß soe ka oah pan, ‘Vakamöß peöß, eën se nö maß, parën ihoß pa ö ihoß vamomoaan.’ Eß se nok va nën, kën kon o ëhnan apuh manih pa matëëra napan kurus to ënëën vaßpeh me ne oah. 11 A, a teß to kë koman hah non a ëhnaneah, e Sosoenën se vöknah rakah en peß. Ivëhkëk, a teß to vöknah koman hah a non, e Sosoenën se kë poan.”

A Taateß Va Pa Vaoe A Ma Napan Po Vaënëën

12 Ke Ieesuß soe ke a teß vëh to vaoe maß poan po vaënëën pan. “Eën se keh nok to vaënëën, eën se nat nom vaoe a ma vakamöß pën, kea pën, pömah, me a ta vöön pën varih o momoniß. Suk ataeah, ee se piun ke pën pa taëën nën to vaëën me raoe. 13 Ahik, eën se keh nok to vaënëën apuh, eën se vaoe a nap arus, me a napan varih no a sioniire to hat, me o teß no a ma moeere to hat, me a nap kekehoß. 14 A pap teß poë varih to hikta onöt ne a piun hah a taëën pën. Ivëh, kën se vaoe raoe, suk ataeah, amot ne Sosoenën se piun hah a taëën pën, pa ö no a nap totoopin se sun hah taneß pa mët.”

A Soe Vapipinoß Va Po Vaënëën Apuh

Matiu 22:1-10

15 A pah teß va pee to pënton a soe vëh, pareß soe ke Ieesuß pan, “A teß se keh ënëën non koman a Matop Vih pe Sosoenën, eß se vaeö rakah.”

16 Ke Ieesuß soe ke poan pan, “A pah teß to kehkeh nok non o vaënëën apuh, ivëh, keß vipuh a ma napan pa nö maß po vaënëën peß. 17 O poen vaënëën to öök vatët rakah en, keß vavipuh en pa teß kikiu peß, keß nö ko vaoe maß a napan varih neß to vipuh moaan voh na pa nö maß. Eß to nö, pareß soe vamanih pan, ‘Nö kurus maß öm, a ma taëën to vamatop vahik en.’

18 Ivëhkëk, ee papaeh to nö, pare soe pan, eße to hikta onöt ne a nö maß. A pah teß to soe pan, ‘Eöß to voen a rak, köß se nö paröß ep. Eöß to hikta onöt noß a nö nös.’ 19 Ka meh teß soe maß pan, ‘Eöß to voen maß a havun purmakaöß marën a nok a kiu, ivëh, köß iu nö noß pa kiu me raoe. Eöß to hikta onöt noß a nö nös.’ 20 Ka vakön teß soe maß pan, ‘Kuru vaßih eöß to vaen vavoon, ivëh, köß hikta onöt noß a nö nös.’

21 Ka teß kikiu pamëh hah en, pareß soe ke susun peß a ma tah poë varih. Ke tövaneah pa iuun pah heve en, pareß soe ke a teß kikiu peß, ‘Eën se nö vëvëhöß pa ma hanan apaßpuh, me o hanan sosoneß va pa vöön vëh, parën me maß a nap arus, me a napan varih no a ma moeere to hat, me o teß kekehoß, me ro teß varih no a ma sioniire to hat, parën me ho maß raoe manih pa iuun peöß.’

22 Ka vasuksuk no a teß kikiu pamëh to soe pan, ‘Apuh, eöß to vatet rakah eoß pa soe pën, ivëhkëk, a ma meh ö ihoß to hikta puh avoeß ne.’

23 Ka teß apuh soe ke a teß kikiu peß pan, ‘Eën se nö pa ma hanan apaßpuh parën suk a sinten a oro koman a rak, parën me ho maß a ma napan. Eöß to iu noß a iuun peöß se puh rakah. 24 Eöß to soe ka neöm, a ma teß kurus varih moaan voh nöß to vipuh raoe, eße to hikta onöt rakah ne a vaëën me a neoß.’”

A Teß Se Kokoman Vavih, Pareß Vatet E Ieesuß

Matiu 10:37-38

25 A ma nap peo rakah to nönö vah me ne e Ieesuß, keß tarih, pareß soe ke raoe pan, 26 “Ta pah teß se keh nö maß peöß, ivëhkëk, eß to hikta iu oah rakah a no neoß pa ö neß to iu va e non e tamaneah, sinaneah, köövo peß, koaß peß, kea peß, vameneah, me o toßtoß koman peß, a teß pamëh to hikta teß non e vamomhë rakah peöß. 27 Ka teß to hikta koman non a mët vaßpeh me a neoß pa kuruse, eß me to hikta onöt non a tavus e vamomhë peöß.

28 A paeh va peöm se iu eok non ta pah iuun vakin rakah, eß se ihoß, pareß kokoman vavih këh o voen in a iuun pamëh. Eß to iu nat non pa tovih moniß rakah neß to öt non to onöt non a vahik a iuun. 29 Eß se keh hikta kokoman vavih momoaan, ko vahoß vahik o simen, pareß hikta onöt non a vahik a iuun. A napan kurus se ep, pare vavovoeak ee pa teß pamëh. 30 Eße se soe pan, ‘A teß vëh to taneo a iuun vëh, ivëhkëk, eß to hikta onöt non a vahik.’

31 Ka teß sunön se iu vapus me non a meh teß sunön, eß se ihoß voh, pareß kokoman vavih momoaan, pan eß to teß me non po 10,000 teß vëvënsun peß, ka meh teß sunön nö me maß po 20,000 teß vëvënsun peß. Ivëh, keß iu nat momoaan non, pan eß to onöt e non pa vapus me a meh teß sunön peß. Keß ahik? 32 Eß se keh nat non pan, eß to hikta öt onöt non a nap vapus, ee se teß varo avoeß e ne maß, keß vanö a soe pan, ee se vaato ko vahik o kokoman va pa vapus.

33 Keß teß va kov e non manih peöm, ta paeh peöm se keh hikta heß tonun a ma tah kurus peß, ko vatet a neoß, eß to hikta onöt non a tavus e vamomhë peöß.”

A Sö Hikta Tetehean

Matiu 5:13, me Mak 9:50

34 “A sö a tah a pah vih rakah, ivëhkëk, o tetehean pa sö se keh hik këh en peß, ea se nok vahvanih, keß tetehean hah? 35 A sö to teß va non nën to hikta onöt non a nok a tah manih peß. Ea se vi rakah ee peß, suk o tetehean to hik këh en peß. A teß to teß me non a tenaneah, eß se pënton.”